Travel dag i går, og no skal det gamle året fullbyrdast. Her i huset skjer det ved ov-eting og nyttårsfeiring i tradisjonell stil. Det vil seie bukkeribbe (sjølvsagt), som no er lagt i bløyt, der ribba skal ligge i 4 timar (full suksess julaftan med same prosess)
Svineribbe er også ynskjeleg. Denne la eg i relativt svak saltlake i går kveld (med litt sukker og pepar), og brukar den nye, bøygde svineribberista som får svoren til å sprike. Dette skal få stå på 90 grader i steikeomnen utover, så girar eg opp temperaturen når vi kjem til kl 17 (middag ca kl 1800). Må sjølvsagt vaktast med haukeblikket.
Karamellpuddingen er for lengst ferdig. Denne er laga etter oldemor si oppskrift, og er enkel jobbing, når fyrst karamellen har hamna i formene. Kunsten er å gjere han akkurat passeleg brend. Svake menneske ynskjer berre såvidt smelta sukker, medan dei med ekstremt mykje hår på brøstet vil ha knekk. Eg ligg midt i mellom...
Så er det dessert nr 2, og her kjem oppskrifta på den beste bærdessert eg veit (Nyttårsgåve til alle lekkermunnar på sentralen
Fyrst treng du molte. Dei plukkast typisk i juli, i to omgongar. Fyrst treng du perfekte bær. Desse er ikkje fullstendig gule. Dei skal ha tydeleg raudskjær, men likevel vere modne, langt frå kart. Du må gå ei stund for å finne akkurat desse, og dei skal frysast for seg sjølv. Og du treng rundt 1,2 - 1,5 liter til ein skikkeleg porsjonsform. Neste moltetur går du når molta er gul. Det du treng no, er molte som saftar seg. Slike ein brukar i kjedeleg moltekrem og sånn. Frysast - utan sukker, det er så vanskeleg å rekne ut kva du treng om du driv med sukring fyrst.
Så ventar du til desember.
Ein stor familieporsjon lagast slik:
Legg 6-8 gelatinplater i kaldt vatn. 6 om du skal servere desserten kjøleskåpskald, 8 dersom du vil ha romtemperatur (smaken er meir markant og betre då, meiner no eg.)
Skil 4 egg. Ha ca 1-1,5 dl sukker i plommane, og lag eggedosis. Her skal du ha i ca 1 dl av safta frå dei gule moltene, 1/2 dl sydlandsk brandy (ikkje for "stram" konjakk) og 1/2 dl heimelaga moltelikør. Eller berre moltesaft - evt heimelaga moltelikør av det brutale slaget (fyll eit 1 l norgesglas med saftmolter. Ha på 4 ss sukker eller bruk din gode smak. Fyll glaset til randen med 60% sprit). Då treng du sannsynlegvis litt ekstra sukker.
Så skal du tilsette safta frå 1/2 sitron. Dette er særleg viktig om du har folk som er skeptiske til molte til bords. (Det som er problemet med molte, er at dei har veldig lite syresmak, og det vert då veldig mektig og søtt utan sitronsaft. Nko som er heilt greitt etter julemat, då orkar du ikkje store porsjonar uansett. Men skal det vere ein perfekt dessert, må du ha sitron).
Neste jobb er å stivpiske eggekvitene. Hald på lenge, og ha gjerne i litt sukker før du startar.
Så piskar du 5 dl kremfløyte passeleg stivt. Då skal vispane kunne stå i kremen, men ikkje noko meir. Smør er ikkje godt til dessert.
No skal alt skje fort. Du treng to passeleg store serveringsbollar, som berre skal fyllast halvfulle. Og ein stor bolle, med plass til alt som skal blandast.
Lat ein assistent vri ut vatnet frå gelatinplatene, og smelte desse, det må vere akkurat passeleg varmt, utan å være nær ved å koke. Og så må guffa vere klar med fingertemperatur når det skal i fromasjen.
1. Vend kremen inn i eggedosisen.
2. Ha i gelatinen, og rør om relativt godt.
3. Vend forsiktig i eggekrivtane.
4. Fyll serveringsbollane halvfulle. Ikkje glatt (noko særleg. Det kan vere litt smårufsete overflate før bæra tømast over).
5. Tøm over dei raude bæra, tilsatt akkurat passeleg med sukker. Det skal ikkje vere for søtt. Hugs moltene er poenget her.
Eit alternativ er å bruke søte villbringebær over moltefromasjen. Funkar vanvittig godt. Vi har prøvd med industribær også, men det vert litt for voldsomt, tykkjer eg...
Ha eit feitt nyttår, og hugs å gå inn på
www.audiophile.no når vi får ny layout og nye artiklar.
