Symjing var eit stort satsingsområde attende på slutten av 60-talet, og der nye skular kom til, var det også symjebasseng. Fram til 1986 lærte så å seie alle nordmenn seg å symje.
Men så kom den store reformen, det nye inntektssystemet til kommunane. Tidlegare var det øyremerka midlar til dei ulike tinga kommunane skulle drive med, og sentrale reglar. No kom denne demokratiske reforma, der kommunane fekk like mykje pengar som før, men utan øyremerking. Kommunepolitikarane var no frie til å prioritere lokalt kva som skulle satsast på, skule, helsevesen, kommunale vegar m.m.
Framleis hadde lokalpolitikarane handlingsrom nok til å ordne slike ting som symjeopplæringa, og på min gamle skule frå 1970, var det symjeopplæring 1 av 2 kroppsøvingstimar i veka heilt inn på 90-talet. Litt mykje, kanskje, men folk lærte å symje.
Etter kvart fann sentralpolitikarane ut at det vart for mykje fridom for kommunepolitikarane. Det kom difor ein del direktiv og forordningar som skulle sikre at kommunane hadde forsvarleg tilbod når det gjeld drikkevatn, byggeforskrifter ++. Men skule vart neglisjert i stadig større grad.
For å spare pengar, "effektiviserte" ein symjeopplæringa, slik at bassenget vart ståande tomt fram til haustferien. Symjetilbodet skulle no unnagjerast fram til vinterferien. Desse månadane utan vatn i bassenget sparte nokre kroner, og det vart viktig når kommunane etter kvart fekk så mange oppgåvar som måtte løysast, utan at det fylgde pengar med. Ein fjerna også vaktmeisteren på skulen, og oppretta ein vaktmeistersentral under eigedomsavdelinga, der ein skulle melde inn behov for tenester. Så skulle eigedomsavdelinga prioritere (som eit døme kan eg trekkje fram at i 1994 vart det ei lekkasje i ei takrenne som sprutar ut over leikeplassen når det regnar, noko som skjer rett som det er her på Vestlandet. Elevane går då under denne "fossen", og vert våte. Etter 18 år har ikkje denne takrenna vorte fiksa, men står truleg framleis på proiritert liste....) det som hasta mest. Vaktmeisteren som skulle jobbe på 4 skular, tre eldretun, kommunehus, kommunelager og sjukeheim fekk seg anna arbeid. Nye vaktmeistrar kjem og går....
Eit år det var ekstra ille økonomi, fekk vi ikkje råd til vatn i bassenget i det heile. Og økonomien vart ikkje betre dei to neste åra heller, slik at bassenget vart ståande vasslaust i til saman 4 år etter kvart. I mellomtida kom det også nye EU-krav til offentlege basseng. Ein skulle tilretteleggje for funksjonshemma. Veldig greitt, og ein god tanke, men det fylgde ikkje pengar med, ho heller. Ei oppussing etter forskriftene ville komme på 4 - 5 millionar, som vi sjølvsagt ikkje hadde, trass i ramaskrik frå foreldra. (For eigen del flytte eg til Spania med heile familien, der alle lærte seg å symje i laupet av eitt år, så eg tok foreldransvar, ja, på den privatiserte måten).
I 2009 fann rektor ut at dette ikkje kunne halde fram. Under eit anfall av sivil ulydnad fann han ut at bassenget måtte fyllast - symjing måtte vi ha i kroppsøvingstilbodet. Så han ville fylle bassenget, i staden for å køyre elevane med buss til nabokommunen, og gje dei eit dårleg tilbod på frå 2 til 7 gongar symjing i året. Nabokommunebassenget var ikkje noko betre enn vårt, så kvifor skulle ikkje vi tøye grensene når nabokommunen gjorde det, og i tillegg selde tenesten til vår kommune?
Før bassenget skulle fyllast, måtte det spylast reint, og rektor fekk starta arbeidet. Men då folk gjekk i rommet under bassenget, rann vatnet tvers igjennom. Etter alle desse åra utan vatn, var det lekk som ein sil.....
Så no var vi i ferd med å gje opp. Men skulen her har fått samarbeid med hotellet, slik at 5 - 6 og 7.klassingane har hatt ca 10 timar symjeoplæring i år i bassenget.
Og alle er lukkelege. Kristin Halvorsen kosar seg med demokratiet sitt, for det er kommunane sitt ansvar å ta seg av undervisningstilbodet.
Foreldra skrik litt, men ikkje verre enn at dei stemmer på AP, Høgre, FrP, KrF, Sp, (ikkje så mykje V og SV heromkring, men ei og anna opprørsliste) kvar gong det er val. For kva er alternativet?
Dei fleste unge flyttar herifrå, til Bergen, der tilbodet er endå verre, fordi dei er påverka av media si framstilling av Den Urbane Herlegdomen, og fordi dei ikkje finn tilfredsstillande arbeid her. Så samlast det for mykje folk i byane, slik at misnøya der vert endå verre enn her. Også når det gjeld symjeopplæring (t.d. skulesjefen i Asker på den tida vi stengde bassenget gjekk ut og sa at "Vi gir elevene i Asker svømmeopplæring i samsvar med forskriftene" - alle grunnskuleelevar fekk 1 - ein - time symjeoppæring i laupet av 10 skuleår. Slik tolka han regelverket....)
Reknar med at ting ordnar seg nokre tiår etter romerrikets fall...