Kombinasjonen, Zombie, er iallfall heilt topp. Bortsett frå når det hopar seg opp uspelte plater, plater som ikkje var så bra som du trudde, og ditto utstyr.
John Harald:
Klart det går an å starte med elektronikk eller signalkjelde, og særleg om du gjer eit godt kupp. Men det finnest mange produsentar av ditt og datt som lagar utstyr som høyrest ganske likt ut. Innanfor ein "høgtalarsjanger" vil du kunne finne hipp-som-happ-alternativ, om du ikkje går for det ekstremt sære, då. Så kunsten er å bygge seg opp såpass med erfaring at ein kjenner seg rimeleg trygg på vite kva ein vil.
Personleg har eg gjennom åra hatt gleda av å ha disponert relativt mykje hifiutstyr av ymse slag, og mi erfaring er heilt klart at høgtalarar gjer mest skilnad på lyden. Dermed er det størst potensiale for lyden å skifte høgtalarar. Så må ein ha fornuftig elektronikk. Ein god effektforsterkar må passe til høgtalarane, og vere i stand til å realisere høgtalarpotensialet. Forforsterkaren må sjølvsagt matche denne, og i tillegg ha dei funksjonane du har bruk for. Dessutan har forforsterkarane oftast svært tydeleg "signatur", så her er eg i regelen veldig nøye. Signalkjelder er også ganske viktig, og mi erfaring er at det er ein større jobb å matche delane i ein vinylrigg enn å få til "fornuftig" digital avspeling. Potensialet er skyhøgt uansett kva signalkjelde du vil gå for. Uansett er eg overtydd om at spoleband (takk til Audioaktør-Terje for fleire hyggjelege demonstrasjonar) er beste kjelda, noko som vert for sært (ja, eg har ein gammal Tandberg, men ikkje relevante teipar. Dessutan må Tandbergen pussast opp med m.a. nye reimar). Kablar tek eg til slutt.
Eg skiftar sjølvsagt berre om eg opplever forbetringar. Og eg er alltid glad når det eg alt har, ikkje treng å skiftast ut. Pengar spart, og mykje styr unngått.
Så den gongen eg "ombestemte" meg sist, vart det nye høgtalarar. Eg høyrde noko som var meir naturleg og realistisk enn alt anna eg hadde høyrt av høgtalarar. Dei var rett nok alt for dyre, men ut frå min logikk er det der det må skytast inn mest ressursar. Skilnad på høgtalarar målast i kilometer, medan kabelskilnadar gjerne utgjer centimeter i samanlikning...
Det heile starta med at eg fekk nokre høgtalarar demonstrert. Eg var ikkje i tvil, dette var ekstremt "naturleg" formidling av musikken og alt rundt. Det var også dei fysisk minste høgtalarane av slik reproduksjonskvalitet eg har opplevd, (kanskje med eitt unntak), og dei burde kunne plasserast i heimen. Eg snakka med butikken og fekk dei demonstrert så godt det lot seg gjere utan å ta dei på heimlån (det er 620 km mellom butikken og stova mi, og høgtalarane veg til saman 170 kg + emballasje), med ulik elektronikk, slik at eg fekk erfare kva handlingsrom og alternativ som kunne brukast. Så las eg meg opp på kva plasseringsutfordringar eg kom til å få, og fann ut at det burde gå greitt å plassere dei i mitt lytterom.
Då høgtalarane kom på plass, måtte anlegget tilpassast desse. Så forsterkaren vart skifta ut med tanke på at høgtalarane hadde behov for massevis av hestekrefter, og eg handla ein forsterkar som hadde såpass detaljeringsgrad + andre gode eigenskapar, at høgtalarane kom til sin rett. Så var tida inne for å vurdere kabling, og det gjekk forbausande bra - skilnaden på mine gamle og dei eg fekk tilsendt av ulikt slag, var marginal.
Eg kunne så vurdere signalkjeldene, og der er eg no. Eg har kjøpt inn ein multiformatsspelar eg likar ganske godt. Det vil vere naturleg å vurdere ein DAK etter kvart, men eg må prioritere mi viktigaste signalkjelde, vinylriggen. Det kjem til å verte kjøpt inn ein ny arm, og det er sannsynleg at min gamle, kjære referansepickup DV 10x5 kjem til å få avløysing. Slik at eg treng ein endå betre riaa, sjølv om matchen eg har no, er svært tilfredsstillande.
Det er berre det at eg har ein noko sær arm, som rett nok gjer ein kjempejobb med Benz og Dynavector, men som slit litt for ofte med andre pickupalternativ. Og då har eg for dårlege tilhøve med tanke på utprøving.
Vinylgalskapen derimot, har eg langt dårlegare kontroll på. Litt under 2000 album, der om lag 90% sjeldan vert spelt. Fann att ei plate eg burde spelt ofte, men det er iallfall ti år sidan sist ho var framme. Har helde meg til favorittversjonane av favorittklassiske innspelingar, medan dei nest beste ikkje har vore spelt anna enn som samanlikningsgrunnlag for fleire år sidan. For ikkje å snakke om dei tredje beste. Av Schubert sine 8. og 9.symfoniar har eg 7 - 8 versjonar, og dei "dårlegaste" har ikkje vore ute av coveret på mange, mange år....
Skulle eg vore fornuftig, hadde eg kvitta meg med iallfall halva av musikksamlinga. Men.....